COLOMBA BIANCA
(la barca de me nono)
Sofia la Bora
e buta le onde’n Cala,
ma ela no xe piu’ là …
e n’anche lori,
Stefano e Giovanin,
cognadi e pescadori.
Buta le onde fin la’ ta le Brule,
ma no la xe piu’ là …
e n’anche lori,
Colomba Bianca che sule onde sgiola
vogada de do stanchi remadori.
Lava le onde grote e slisa lise,
ma piu’ là no la xe …
e n’anca lori,
Colomba Bianca e i s’o veci marineri
che drio la Ponta i feva i minadori.
~ Antonietta Benčić Petercol
AL CONTE
Al Conte con le braghe onte
e 'l capèl de pàja,
al vol daghe fogo a la caldaia;
la caldaia fogo no vol ciapà
e 'l Conte, tùta forsa, ghe toca sufià,
fin che la caldaia fogo no jò ciapà.
E 'n'tanto al Conte con le braghe onte
e 'l capèl de pàja,
ghe xe saltada 'n aria la caldaia.
Povero Conte!...che te jò tocà!
Ti podevi 'n po' de meno sofià!
~ Claudia Bencich
QUEL MANDOLER
Quel mandoler che jo piantà mè mare
Jo meso radighe forte sula tera de mè pare.
Al lasa i brasi in siel,
'L saluda 'l vento,
E i sioni lo consola co 'l piora
Che no lo vedo la zento.
Petali, n' Primavera,
Al sparnisa par corto
Come risi sui novisi,
E da quei fiori, de Istà,
De mandole
Mi le scarsele 'mpinisi.
Al sfida la Bora de sora la Valverana,
'L scolta 'tento ogni sonà de campana.
Al nasa 'l odoro che la bava ghe porta
E de aria sana 'l se fa 'na bela scorta.
''Salute'' 'l ghe dix al Sol che se alsa de la de drio la Ponta,
''Te speti bonora, doman!'' co a Montiron 'l tramonta.
~ Antonietta Benčić Petercol